Coller o FEVE é adentrarse nunha aventura. Se temos a sorte de que o percorrido é completo e o estado das vías non obriga a cambios, visitamos diferentes aldeas, pasamos á beira do mar, no medio do monte, e mesmo partillamos as vivencias desas mulleres e homes que empregan esta vella ruta de vía estreita para ir aos lugares de traballo, mercados ou mesmo estudos, e fan do tren o seu elemento de comunicación habitual. Son oito horas de traxecto de Oviedo a Ferrol, que paga a pena probar. Experimentar esa cercanía dos trens de antes, e desconectar… porque está claro que non hai presa.